នាយករដ្ឋមន្ត្រីសុំការអភ័យទោសពីមេដឹកនាំប្រទេសជាមិត្តចំពោះអវត្តមានភរិយាក្នុងកិច្ចប្រជុំកំពូលអាស៊ាននាពេលខាងមុខ
ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន និងជាប្រធានអាស៊ានឆ្នាំ២០២២ បានសុំការអភ័យទោសចំពោះប្រមុខរដ្ឋប្រមុខរាជរដ្ឋាភិបាលដែលអញ្ជើញចូលរួមក្នុងកិច្ចប្រជុំកំពូលអាស៊ាននៅពេលខាងមុខ ចំពោះអវត្តមានរបស់ភរិយាគឺសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលមិនអាចចូលរួមអមសម្ដេចក្នុងកិច្ចប្រជុំនាពេលខាងមុខបាន។
សម្ដេចតេជោបានសរសេរនៅលើ facebook page របស់សម្ដេចនៅព្រឹកថ្ងៃទី៦ ខែវិច្ឆិកា ឆ្នាំ២០២២នេះថា ការអវត្តមានរបស់សម្ដេចកត្តិព្រឹទ្ធបណ្ឌិតនៅក្នុងការប្រជុំនានាកន្លងមក និងកិច្ចប្រជុំកំពូលអាស៊ាននៅពេលខាងមុខគឺដោយសារតែសម្ដេចកិត្តិព្រឹទ្ធបណ្ឌិតមានបញ្ហាសុខភាពទាក់ទងទៅនឹងឆ្អឹងខ្នង។
សម្ដេចតេជោថា៖ «ភរិយាខ្ញុំមានបញ្ហាសុខភាពទាក់ទងដល់ឆ្អឹងខ្នងដែលគ្រូពេទ្យតម្រូវឲ្យគាត់មិនអាចអង្គុយយូរបាន។ ខ្ញុំសូមការអធ្យាស្រ័យពីលោកជំទាវភរិយាប្រមុខរដ្ឋ ប្រមុខរដ្ឋាភិបាលនៃប្រទេសនានាដែលនឹងអញ្ជើញមកកម្ពុជានាប៉ុន្មានថ្ងៃខាងមុខដែលភរិយាខ្ញុំមិនអាចចេញទទួលបានដោយសារស្ថិតក្នុងរយៈពេលនៃការព្យាបាល»។
កិច្ចប្រជុំកំពូលអាស៊ានឆ្នាំ២០២២ និងប្រព្រឹត្តិទៅពីថ្ងៃទី១០ ខែវិច្ឆិកា រហូតដល់ថ្ងៃទី១៣ ខែវិច្ឆិកា ឆ្នាំ២០២២ នៅរាជធានីភ្នំពេញ ប្រទេសកម្ពុជា៕